BAR BOO é un documental que pretende reivindicar a figura do falecido actor vigués Luis Bar Boo. O equipo leva dous anos preparando este filme, traballando arreo para homenaxear o camaleónico actor. Gravado na súa totalidade e en plena fase de montaxe, moitas foron as entidades, familiares e personalidades do cinema que se prestaron a participar no proxecto desinteresadamente.
Con todo, a TVG, a televisión pública galega, non nos facilitou o acceso gratuíto a certos clips nos que aparece Bar Boo e que entendemos fundamentais para finalizar o documental. A cantidade que nos piden pola cesión dos dereitos destas imaxes, cuxa duración non excede de 59 segundos, ascende a 1.600 €.
É por iso que vos pedimos unha axudiña final — a cambio dunhas fantásticas recompensas — para rematar o filme por todo o alto.
